Wanda Mider
WIELKANOCNI ŚWIYNTA
Już Wielkanoc w kalyndorzu
Tóż sie wszyscy radujymy
Co nejlepsze gospodarzóm
Dzisio z serca życzyć chcymy
Zdrowia! Zdrowia nejlepszego
Bo to przeca nejważniejsze
A do tego ździebko szczynścio
Życi bydzie hnet wiesielsze
Szynki fajnie łuwyndzónej
I to we swojim wyndzoku
Dobrze też wyrosolónej
To też trzeja mieć na łoku
Babóweczke pieknie upiyc
By nie zrobił sie zokalec
Dać wanilki do postrzodka
Maku hrubo jak na palec
Przedtym dać to kole pieca
Niechać – aż do wyrośniyńcia
Babka bydzie isto pulchno
Jako dupka niemowlyncia
Śmiergust niech je jak sie patrzi
Nie szporować w tym dniu wody
Taki kiejsi był łobyczaj
I każdy był żeśki – zdrowy
Mokry śmiergust dobrze wróży
Tóż sie dziołchy radowały
Kiedy chłapcy całóm kupóm
Sikowkami polywali
Wajca kurzi dobrze łumyć
Wszelijako pomalować
Na talyrzu ich ułożyć
Z trzitym chrzónym na stół podać
Potym siednóm kole stołu
Dómownicy i przociele
Świynta radość im prziniesóm
Pojednani i nadzieje.