Hej ludkowie, Czy wiycie, że młodym ludzióm w naszym mieście sie zdo, że Ustróń wszycko robi jyny dlo emerytów? Tak powiedziała cera łod moji kamratki, kiero je samotno, tóż mo czas i chynci, coby jeździć na imprezy do Cieszyna, Biylska, a ponikiedy aji do Katowic. Jak my sie z jejóm mamóm zadziwiły, że tak myśli, tóż zaczyła wyliczać co tu mómy: Uniwersytet Trzecigo Wieku, kiery mo zajyncia płatne, ale wszycki wykłady, kóncerty w Prażakówce, w muzeum, czy w bibliotece za darmoche, a jeszcze teroski łod tego roku aerobik, tańce, śpiewani, malowani wszycko bezpłatne do syniorów!
Dziwómy sie na nióm kapke zaskoczóne, a óna prawi: – Tóż pokoż mi ustróńskóm! Kaj kieróm tam mosz pod rynkóm. Może być łostatnio, jo z kożdym nómerym Wóm to ukożym. I tak my przeglóndały pore nómerów i doista fórt imprezy dlo starszych, ale przeca też sóm dlo młodych i dlo dziecek. Tu kożdy znóndzie cosi dlo siebie. Jesi chce.
Nó, seniorzy tóż radujmy sie z tego, że tu ło nas dbajóm, że hej! Jak my byli młodzi i musieli zarobiać na rodzine, wychowywać dziecka, to człowiek był nieroz tak utropióny, że ani nie pomyśloł coby iś na jaki koncert, czy insze spotkani. A teroski my emeryci mómy już na to czas i korzystejmy z tego, bo życi przeca je krótki. Mogymy przyjymnie spędzić tóm zimowóm pore, spotkać znómych, porzóndzić śnimi przi kawie czy herbacie i ciastku (bo czynsto sóm na imprezach poczynstunki), tóż nima co siedzieć w chałupie i jowejczeć, ale korzystać z życio, skoro to nic nie kosztuje. Ponikiery powiy, że je nimocny, że ledwo żyje, że sie mu niczego nie chce, ale tam przi kamratach i dobrej muzyce niejedyn choć na chwile zapómni ło choróbskach i rozmaitych starościach. Tóż do zobaczyska!
Staro ustrónioczka