Ludkowie

Choć ponikiedy je hyc nie do łopisanio, to jednakowoż jakosi żyć trzeja i jeszcze bardziyj dbać ło zdrowi, bo co rusz sie słyszy, że kierysi je nimocny. A snoci nejlepszo je ta profilektyka, tóż wybrały my sie pospołu z kamratkóm do takigo młodego dietetyka, bo przeca łod dobrej żywności do zdrotności jedyn krok. Dochtór był miły, młody i przystojniak, że hej! A choć mógby być moim wnukym, to przeca miło sie na takigo eleganta podziwać. Kozoł se stanóć na takóm woge z kierownicami, kiere trzeja było dzierżeć w rynkach przez pore minut. I już nie musioł sie mie ło nic pytać, bo wszycko było widać na tym urzóndzyniu.  Tak se myślym, że teroski dochtorzi sie doista majóm dobrze, bo maszyny za nich calutkigo człowieka zbadajóm. I to akuratnie! Ale łokozało sie, że jo też sie móm doista dobrze, bo wyszłach z tamota w szampańskim humorze. Bołach sie, że jak stanym na te woge to mi ukoże żech je grubasym, jako co drugi kierego sie widzi na ceście. A tu ni! Jyny móm pore kilo, kiere trzeja by było spuścić. Wszycko insze na granicy normy, a jak mosz siódmy krzyżyk, to je doprowdy dobrze. I jeszcze do tego moja metryka ukazuje, że móm za moc roków, bo tak po prowdzie to móndre urzóndzyni wycyniło mie na szternoś roków miyni. Tóż jakóż sie nie radować? Z wrażynio poszłach zaroziutko do aportu, dziwóm sie do zdrzadła i doista łodmłodniałach! Co to znaczy siła działanio nowomodni maszyny! Kamratka też była z badanio zadowolono, bo zdo sie, że jóm ta machina jeszcze bardziyj łodmłodziła. Ale tak po prowdzie to kożdy by jóm wycynił na nejwyżyj pindziesiónt roków, abo i miyni. Tóż taki radosne młódki poszły my do lodziarni, bo przeca należała sie nóm nagroda za bardzo dobre wyniki. I tak prowie kożdy dziyń fajnie świyntujymy. Sprubujcie, to doista działo.
Staro ustrónioczka