Hej, lato w pełni!
Tóż laba na całego. Do moich znómych przijechały wnuki z Katowic i pumogały łobiyrać trześnie i rybiźle. To wszycko dlo miastowych dziecek je taki nowe. Pumogajóm kopać na zogónach, kormióm kury i choć możne ta wiejsko robota hónym jich znudzi, to jednak gazdowie majóm pumoc, a wnuki rozmaite nowe wyzwania. Zdo mi sie, że je dzisio tako moda, coby jechać na zagramaniczne wczasy, a nejlepi poza Europe, bo Chorwacja i Hiszpania już sie downo łowidziały, tóż możne łoto baji Afryka, choć tam już też kaj kiery był. Tóż nie dziwota, że tak sie przitrefi, że aji ustróniocy spotkajóm sie kansik pod piramidami, abo na tym dłógucnym chińskim moście. Rajzowani po świecie je w modzie, tóż podobno naprzeciwko Savi (dzisiejsze Euro) łotwiyrajómi biuro turystyczne. Isto przez najbliższe roki bydzie miało wziyńci, bo choć ludzie narzykajóm na drożyzne, to dycki byli tacy i fórt sóm, co prziszporujóm kapke a wyjadóm, bo to majóm radzi, a jeszcze je to w modzie, tóż trzeja sie wybrać do egzotycznych krajów, porobić fotki i pochwolić sie znómym. Ale cóż podobno podróżowani to jedyna rzecz na kieróm wydowo sie piniądze, a człowiek staje sie bogatszy, bo jak rajzujesz, to po rozmaitych doświadczyniach inaczyj widzisz siebie i wszystko wokół.
A jo se spóminóm, downe roki jak w lecie były taki doista robotne dni, tóż sie pumogało starzikóm młócić łobili, łoto baji łowies, czy pszynice. Ponikierzi gazdowie sadzili reż, z kierej słóma była na strużoki, ale u nas tego nie pamiyntóm. A skryntki do wiónzanio łobilo robili my dziecka isto z pszynicznej słómy. Harowało sie też nieroz w wielkim hycu i była to doista utropa, ale dzisio sie to z syntymyntym spómino. Tóż nie dziwota, że jak było kapke wolnego czasu, to z radościom człowiek legnył na trowie i dziwoł sie na chmury. Czy dzisio też by to była jeszcze dlo kogo atrakcja?
Staro ustrónioczka