Jako sie mocie babeczki
W tym tydniu mómy babski świynto, tóż nie dziwota, że fryzjerki i kosmetyczki sóm łoblegane łod rana do śćmiywka. Doista idzie powiedzieć, że majóm prowdziwe żniwa. Dyć niejedna starka z syntymyntym spómino łobchody tego świynta w peerelu jak dostowały my łoto baji w Kuźni po goździku i rajtuzy. Dzisio by niejedyn sie z tego uśmioł, ale my były młode i zdrowe, a tyn świat też inaczyj wyglóndoł. Dzisio niejedna downo elegantka chodzi już z loskóm, ale też chce jeszcze jako tako sie pokozać.
A, że nastało przedwiośnie i robi sie coroz ciepli, tóż je to też dobry czas na wiosynne porzóndki i ukludzani wszelijakigo bajzlu kole chałupy. Niejedna gaździnka już rozmyślo coby sioć w zogródce. Ale przeca podziwejcie sie ponikiedy do zdrzadła jako Wasze przileżałe przez czopki włosiska po zimie wyglóndajóm. Jedna kamratka dycki powiado, że dopóki nosi w zimie kłobuk, to nie łodwiedzo fryzjera, ale już je coroz ciepli i trzeja bydzie łodkryć te głowe, posztrajchować siwe włosy i ukozać sie ludzióm z szumnóm fryzurom, to zaroz sie łodmłodnieje. Tóż zdo mi sie, że werci wybulić stówke, czy dwie, potym sie wyłoblykać jak sie patrzi i umówić do jaki cukiernie na babski świynto.
W dobrym towarzystwie dycki humor dopisuje, tóż tej radości i wiesiołości dycki Wóm życzym. Kochane babki ty młodsze i kapke starsze rozkwitejcie na wiosne nie jyny w babski świynto.
Staro ustrónioczka
