Ludkowie, czy wszyscy żeście sóm nimocni?
Dyć kaj kogo pytóm, to abo jeszcze z choróbska nie wyszeł, abo fórt krzipie i forsko – to ani nie trzeja sie pytać. Tóż kożdy dziyń sie tego nawysłóchujym, że gorónczka wysoko – sztyrycet, abo wiyncyj i nielza ji zbić, że potym zaś chyto ryma i krzipota, a biyda z tego sie wykaraskać. Że nieroz całe rodziny łod dziecek do syniorów chorujóm jak za czasów pandymicznych, a coroz czyńści sie widzi, że ludzie zaś zakrywajóm gymby jako hań downi. Niejedyn narzyko jaki to sóm u dochtorów kolejki, tóż se myślym: Na ludzie, dyć poradźcie se sami! Mie sie jakosi choroba nie chyto, a jak już mi sie co przitrefi, to tako słabota na jedyn dziyń i zaś je dobrze. Ani bardzo tego po mie nie widać.
Wiym, że na taki poważne choróbska bierecie rozmaite cetle, a nieroz aji ty pieróński antybiotyki, do kierych niejedyn ganc prziwyknył, choć wiadomo, że to zdrowe ni ma. Jako już chcecie tak se róbcie, ale coby mieć dobre zdrowiczko, to trzeja sie ło to dycki starać. Nie jyno w zimie, ale calutki rok! Tej łodporności wierzcie mi nielza nadrobić za pore dni! Tóż nie jowejczcie żeście sóm nimocni, jyno starejcie sie nie dopuścić do choroby.
Moja serdeczno kamratka poleco takóm miksture z samych dómowych produktów. Biere ze dwa -trzi kiszone łogórki, gorść kiszonej kapusty, główke czosku (może być też kiszóny, bo je łagodniejszy w szmaku, a też przeca zdrowy), jednom cytróne łobranóm ze skórki i ze dwie łyżki oliwy. Potym trzeja to wszycko rozmarasić, łoto baji blynderym, a jak to je kapke za suche to cyrkóć kapuśniónki, abo wody z łogórków. I kożdy dziyń brać se po łyżeczce, abo i dwie rano i wieczór. Rozmaitych recepisów na zdrowotność je doista moc. Młodzi chladajóm w internecie coroz to nowomodnich sposobów, ale potym nieroz i tak jak już sóm nimocni, to lyczóm sie tymi tradycyjnymi lykami ze starczynej szpajski, już nieroz sprawdzónymi. A do tego trzeja sie hartować, spać przi lodewrzitym łoknie, ale też byle czy się nie przejmować i z optymizmym i radościóm witać kożdy dziyń. Tóż życzym Wóm zdrowiczka. Nie dejcie sie przeca chorobie!
Staro ustrónioczka