Po naszymu…

Witejcie moji kochani,
Prziznóm sie Wóm, że czy w zimie, czy w lecie dycki w pióntek żynym z taszkami na torg po taki dómowy prowiant, łoto baji: mlyko łod krowy, marekwie i wszelijakóm zielynine na polywke, nó i dómowe ziymnioki, a roz za czas zamawióm aji kurczoki. Ale w ty zimowe miesiónce tyn torg je taki pustawy i smutny. Jyny pore straganów czynnych, nó i ludzi też nie chodzi tela co wiosnóm, w lecie i na jesiyń. Na szczyńści sóm ty szykowne gaździnki, na kiere dycki idzie liczyć. Czy padze deszcz, czy śniyg suje, w kożdy pióntek sóm Danusia i Marysia, ale też Halinka z Januszym i Edek. Tóż dziynki nim my mieszczuchy nie zostanymy ło  łodzie. Prowda, że w pobliskich sklepach je towaru doś, nie jyno rodzime produkty, ale też jakisi łowoce z Afryki, czy Ameryki. Dzisio tyn świat doista zmaloł. I zdo sie, że wszyndzi je blisko. Wsiedniesz do samolota i ło pore godzin możesz być na kóńcu świata i tam delektować sie ichnimi uprawami. Łoto baji awokado, liczi, kiwi, granat, banan, arbuz, melon czy ananas na wycióngniyńci ręki. Ale jo tego ni móm rada, a niejednych atrakcyji ani nie znóm szmaku. Na zime nejlepsze sóm dómowe łogórki kiszóne, kapusta, abo zakwas z buraków. A do tego  jeszcze żarnówka, łorzechy, pieczki i moc rozmaitych dómowych dobroci łod naszych przekochanych gaździnek i gazdów. I to wszystko co pióntek, a ponikiedy też w sobote na naszym torgu idzie kupić aji w zimie. Bo ty robotne gaździnki sóm niezawodne i ich towary dycki majóm powodzyni. Już wczas rano ludzie stojóm w łogónku po dómowe delicje. Tóż w imiyniu wszystkich zadowolónych klijyntów, kierych w Ustróniu je doista moc, dziękujym Wóm serdecznie. Byjcie dycki zdrowi i pamiyntejcie ło mieszczuchach kierzi Was szczerze radzi majóm i na nejlepszy towar co tydziyń ciyrpliwie czakajóm.
Staro ustrónioczka