Jako sie też mocie
Downo żech sie nie łodzywała, bo ty wybory moc miejsca w gazecie zajmowały, a w zogródce też móm fórt jakómsik pilobe, tóż nie stołach ło to, coby sie rozpisować. Nieroz sie litujym nad syniorami zdanymi na łaske inszych, ale sóm też ludzie kierzi se radzóm w całym żywobyciu nad podziw. Łoto baji pore tydni tymu nawiedził mie starszy kamrat, kierego móm strasznucnie rada i doista żałujym, że ponikiedy jak to prawióm ruski rok sie nie widzymy. Łón miyszko w Skoczowie w swoji chałupie i nazywany je łojcym biorytmów. Napisoł ło tym pore ksiónżek, w kierych radzi, coby ludzie sie dobiyrali zgodnie z tym pod jakim znakym zodiaku sie kiery urodził. Je to doprowdy móndry człowiek, dochtór prawa. Rada posłóchóm jego życiowych móndrości, bo łón doista umiy żyć. Mo 94 roki, a prawi że dożyje 100 roków plus wat i je to możebne. Mówi, że mo idealne samopoczuci i tego też wszyckim życzy. Nie chodzi po dochtorach, ni ma na nic nimocny i jeździ autym, choć łod dziecka mo jyno jedno łoko, a drugi stracił po wojnie, bo jako dziecka znaszli jakisi niewybuch. Ale mimo to, je człowiekym sukcesu, pomocnym wielu ludzióm. Radzi wszyckim coby wierzić w siebie, być aktywnym, tolerancyjnym, zdyscyplinowanym i unikać używek, a nade wszystko nie dopuszczać do siebie złych myśli. Napisoł pore poradników jak żyć zgodnie z biorytmami, bo kożdy z nas mo nieroz niż fizyczny czy psychiczny, a inszym razym wyż. To idzie łobliczyć i przewidzieć. Je to doista dobrodziejstwo dlo wszyckich, co chcóm żyć świadomie, pełnióm, życia i radzić se z przeszkodami na swoji życiowej ceście. Dobrze, że sóm tacy sprawni ludzie w wieku matuzalymowym, tego wszyckim winszujym. Staro ustrónioczka